បន្ទាយមានជ័យ៖ ទំនប់ស្ដេច ក្នុងស្រុកថ្មពួក ខេត្តបន្ទាយមានជ័យត្រូវបានទឹកហូរច្រោះផ្ដាច់នៅព្រឹកនេះ ខណៈអាជ្ញាធរកំពុងជួយសង្គ្រោះពលរដ្ឋ និងបិទឡើងវិញ។
ក្នុងសប្តាហ៍នេះ ខេត្តបន្ទាយមានជ័យ ទទួលរងរបាយទឹកភ្លៀងធ្លាក់រាយប៉ាយពីបង្គួរទៅច្រើនជាប់ៗគ្នា និងទទួលលំហូរទឹកមកពីព្រំដែនថៃ និងស្រុកបរវិល ខេត្តបាត់ដំបង បានបង្ករឲ្យមានការជន់លិចនៅតំបន់មួយចំនួន តាមបន្ទាត់ព្រំដែន។
កាលពីយប់រំលងអាធ្រាតឈានចូលថ្ងៃទី១២ កញ្ញា នេះដោយសារស្ថានភាពទឹកហូរច្រើនពេកបានបណ្ដាលឱ្យហូរដាច់ទំនប់ស្ដេច ដែលមានភូមិសាស្ត្រក្នុងភូមិស្តៅ ឃុំគោករមៀត ស្រុកថ្មពួក ខេត្តបន្ទាយមានជ័យ ទោះជាយ៉ាងអាជ្ញាធរនៅពេលនេះកំពុងរៀបចំកាយបិទផងដែរ។
ក្រៅពីស្រុកថ្មពួក នៅឃុំទួលពង្រ ស្រុកម៉ាឡៃ ខេត្តបន្ទាយមានជ័យ ក៏រងនូវការជន់លិចដោយសារជំនន់ទឹកភ្លៀងដែរ ខណៈអាជ្ញាធរនៅពេលនេះកំពុងកាយទឹករំដោះចេញ។
ក្នុងពេលចុះពិនិត្យ ស្ថានភាពទឹកជំនន់នៅព្រឹកនេះ អភិបាលខេត្តបន្ទាយមានជ័យលោក អ៊ុ រាត្រី បានណែនាំ ដល់មន្ត្រីរបស់ខ្លួនឱ្យត្រៀមលក្ខណៈគ្រប់មធ្យោបាយដើម្បីឆ្លើយតបដោះស្រាយភ្លាមៗ ក្នុងករណីមានគ្រោះទឹកជំនន់ធ្ងន់ធ្ងរកើតឡើង ក្នុងនោះលោកក៏បានណែនាំដល់ប្រជាពលរដ្ឋ ត្រូវមានការប្រុងប្រយ័ត្ន ស្តាប់តាមការជូនដំណឹង និងការប្រកាសរបស់អាជ្ញាធរ ដើម្បីជៀសផុតពីគ្រោះថ្នាក់ បើក្នុងករណីមានគ្រោះធម្មជាតិទឹកជំនន់នេះកើតឡើង៕
